Oʻzbekistonda tabiat haqidagi maʼlumotlar raqamlashtirilmoqda
28-iyul kuni Green Universityda biologik xilma-xillik hamda alohida muhofaza etiladigan tabiiy hududlar haqidagi maʼlumotlarni birlashtiruvchi milliy ECODATA platformasi taqdim etildi.
Aslida, ECODATA Oʻzbekiston tabiatiga oid maʼlumotlarni jamlaydigan yagona milliy maʼlumotlar bazasi hisoblanadi. Unda noyob oʻsimlik va hayvon turlari, qoʻriqlanadigan hududlar, oʻrmonlar, suv-botqoq ekotizimlari hamda boshqa tabiiy obyektlar haqidagi maʼlumotlar jamlanadi.
Loyiha ishlab chiquvchilarining taʼkidlashicha, bugungi kunda ekologik maʼlumotlar turli davlat idoralari, ilmiy muassasalar va tabiatni muhofaza qilish tashkilotlarida alohida saqlanmoqda. Yangi platforma ushbu maʼlumotlarni yagona tizimga birlashtirib, ulardan foydalanishni ancha qulaylashtiradi.
Olimlar uchun bu ilmiy tadqiqotlarda zarur maʼlumotlarga tezkor kirish imkoniyatini yaratadi. Davlat organlari ekologik dasturlar va hisobotlarni tayyorlashda dolzarb maʼlumotlardan foydalanishi, qoʻriqxonalar va milliy bogʻlar xodimlari esa muhofaza etiladigan hududlarning holati haqidagi maʼlumotlarni muntazam yangilab borishi mumkin boʻladi.
ECODATA yettita moduldan iborat boʻlib, oʻzaro bogʻlangan 60 dan ortiq maʼlumotlar bazasini birlashtiradi. Tizimda Oʻzbekiston Qizil kitobiga kiritilgan turlar, ularning yashash muhitlari, alohida muhofaza etiladigan tabiiy hududlar, oʻrmon va suv fondi hamda ilmiy tadqiqotlar natijalari haqidagi maʼlumotlar saqlanadi.
Kelgusida platformani mobil ilova, maʼlumotlarni avtomatik yangilash tizimi hamda xalqaro ekologik maʼlumotlar bazalari bilan integratsiya qilish rejalashtirilgan.
ECODATA Aral Sea Wetlands loyihasi doirasida ishlab chiqilgan. Loyiha Ekologiya va iqlim oʻzgarishi boʻyicha milliy qoʻmita tomonidan BMT Taraqqiyot dasturi (UNDP) hamda Global ekologik jamgʻarma (GEF) ko‘magida amalga oshirilmoqda. Uning asosiy maqsadi Quyi Amudaryo hududidagi biologik xilma-xillikni saqlash va suv-botqoq ekotizimlarini tiklashdan iborat.
Ommabop
Turkmaniston va WWF noyob hayvonlarni muhofaza qilish uchun hamkorlik qiladi
Turkmaniston va Butunjahon tabiatni muhofaza qilish jamg‘armasi (WWF) tabiatni muhofaza qilish sohasida hamkorlik to‘g‘risidagi memorandumni imzoladi.
Turkmanistonda “Green School” dasturiga yana 100 ta maktab qo‘shildi
“Green School” (“Yashil maktab”) dasturiga yana 100 ta maktab qo‘shildi. Endilikda loyiha mamlakat bo‘ylab 120 ta ta’lim muassasasini qamrab olmoqda.
Markaziy Osiyo muzliklari: Nega ularning kelajagi mintaqaning har bir aholisi uchun muhim?
Muzliklar kamdan-kam hollarda yangiliklar markazida bo‘ladi. Biroq so‘nggi yillarda ular xalqaro kun tartibining tobora muhim mavzularidan biriga aylanmoqda.