Qozog‘istonda universitet jamoalari o‘rtasidagi ilk jahon shaxmat chempionati bo‘lib o‘tmoqda
Olmaota shahrida FIDE universitet jamoalari o‘rtasidagi ilk jahon chempionatining final bosqichi bo‘lib o‘tmoqda. Ushbu musobaqa Qozog‘istonning xalqaro shaxmat maydonidagi mavqeini yanada mustahkamlayotganini ko‘rsatadi.
3–10-avgust kunlari Al-Farobiy nomidagi Qozoq milliy universiteti yangi tashkil etilgan musobaqaning finaliga mezbonlik qilmoqda. Olmaotaga onlayn saralash va pley-off bosqichlaridan muvaffaqiyatli o‘tgan dunyoning 16 ta eng kuchli universitet jamoasi tashrif buyurdi.
Musobaqa bu yil Xalqaro shaxmat federatsiyasi (FIDE) tomonidan yo‘lga qo‘yildi. Uning maqsadi universitet jamoalari uchun alohida jahon musobaqasini yaratish va talabalar shaxmatini xalqaro sport taqvimining mustaqil yo‘nalishiga aylantirishdir.
Xo‘sh, nega final aynan Olmaotada o‘tkazilmoqda?
Bunga sabab Qozog‘istonning so‘nggi yillarda yirik xalqaro shaxmat musobaqalarini muvaffaqiyatli tashkil etib kelayotganidir.
2022-yil dekabr oyida Olmaota FIDEning rapid va blits bo‘yicha jahon chempionatlariga mezbonlik qildi. Musobaqada Magnus Karlsen, Yan Nepomnyashchiy, Hikaru Nakamura kabi dunyoning yetakchi grossmeysterlari ishtirok etdi.
2024-yilda esa Ostona Rapid va blits bo‘yicha jamoalar o‘rtasidagi jahon chempionatini qabul qildi. Unda o‘nlab mamlakatlardan 300 nafardan ortiq shaxmatchi qatnashdi.
Bundan tashqari, Qozog‘iston muntazam ravishda maktab o‘quvchilari va yoshlar o‘rtasidagi FIDE musobaqalariga ham mezbonlik qilib kelmoqda. Bu esa mamlakatning xalqaro shaxmat markazlaridan biri sifatidagi obro‘sini mustahkamladi.
Shu nuqtai nazardan qaraganda, universitetlar o‘rtasidagi ilk jahon chempionatining finali aynan Qozog‘istonda o‘tkazilayotgani tabiiy davomiylik sifatida ko‘rinadi.
Final uchrashuvlari Al-Farobiy nomidagi Qozoq milliy universitetining Farabi Hub majmuasida bo‘lib o‘tmoqda. Yevropa, Osiyo, Shimoliy va Janubiy Amerikadan kelgan universitet jamoalari 50 ming yevrolik mukofot jamg‘armasi uchun bahs olib bormoqda.
Chempionat nafaqat sport musobaqasi, balki FIDEning ta'lim tashabbuslari doirasidagi loyihalardan biri ham hisoblanadi. Federatsiya shaxmatni tanqidiy fikrlash, tahliliy ko‘nikmalar va universitet ta'limini rivojlantirish vositasi sifatida ilgari surmoqda.
Markaziy Osiyo uchun ushbu musobaqa mintaqaning ta'lim, ilm-fan va intellektual sport sohalarida tobora ko‘proq xalqaro tadbirlarga mezbonlik qilayotganini ko‘rsatadi. Qozog‘iston uchun esa bu yana bir bor yirik jahon musobaqalarini yuqori darajada tashkil eta olishini namoyish etish imkoniyatidir.
Ommabop
Ashxobod xalqaro bolalar shaxmat turniriga mezbonlik qiladi
19–20 avgust kunlari Ashxobodda ilk xalqaro Kids Expo–Chess Cup turniri bo‘lib o‘tadi. Turnirda 15 dan ortiq mamlakatdan yosh shaxmatchilar ishtirok etishi kutilmoqda.
«Games of the Future – 2026» raqamlarda: Astanadagi turnir qanday o'tdi
50 dan ortiq mamlakatdan 800 nafardan ziyod sportchi, 453 million tomosha va qariyb 29 ming tomoshabin. Astanada raqamli va an'anaviy sportni birlashtirgan eng yirik xalqaro musobaqalardan biri – «Games of the Future – 2026» yakuniga yetdi.
Formula 1 H2O ilk bor Issiqkoʻlda bo‘lib o‘tdi
Musobaqalar 31-iyuldan 2-avgustgacha Issiqkoʻlning janubiy sohilidagi Bayet qishlogʻi yaqinida bo‘lib o‘tdi.