Qozog‘istonlik grossmeyster FIDE ayollar reytingining kuchli beshligiga kirdi

Iyul oyidagi FIDE reytingi yangilangach, Bibisara Asaubayeva 2538 reyting ochkosi bilan dunyo reytingida beshinchi o‘ringa ko‘tarildi. Bu uning sport faoliyatidagi eng yuqori natija bo‘ldi.

FIDE ayollar jahon reytingining kuchli beshligiga kirishi Asaubayevaning faoliyatidagi yangi yutuq bo‘lib, Qozog‘iston ayollar shaxmati tarixidagi eng yuqori natijalardan biri hisoblanadi.

Shaxmatchining reytingdagi o‘sishiga Norway Chess Women 2026 turniridagi g‘alabasi sabab bo‘ldi. Musobaqa yakunlariga ko‘ra, Asaubayeva 11 reyting ochkosini qo‘lga kiritib, jahon reytingida yettinchi o‘rindan beshinchi o‘ringa ko‘tarildi.

Norvegiyadagi g‘alaba qozog‘istonlik shaxmatchini FIDE Women's Circuit turnirlar seriyasining joriy hisobida ham peshqadamga aylantirdi. Mazkur seriya natijalari Pretendentlar turnirining ishtirokchilaridan birini aniqlashda hisobga olinadi. FIDE Women's Circuit g‘olibasi Pretendentlar turniriga yo‘llanma oladi, ushbu turnir g‘olibasi esa jahon chempionligi uchun o‘yinda qatnashish huquqini qo‘lga kiritadi.

Asaubayevaning yutug‘i Qozog‘istonda ham e’tirof etildi. Iyun oyi oxirida Prezident Qosim-Jomart Toqayev uni II darajali «Barys» ordeni bilan taqdirladi. Davlat mukofotini Prezident topshirig‘iga binoan Madaniyat va axborot vaziri Aida Balayeva topshirdi.

Asaubayeva blits bo‘yicha ikki karra jahon chempioni hisoblanadi. Hozirda u FIDE ayollar jahon reytingida beshinchi o‘rinni egallab turibdi hamda FIDE Women's Circuit musobaqalari joriy hisobida peshqadamlik qilmoqda. Agar u mavsum oxirigacha ushbu yetakchilikni saqlab qolsa, Pretendentlar turniriga yo‘llanma oladi. Mazkur turnir g‘olibasi esa jahon chempionligi uchun bahs olib borish huquqiga ega bo‘ladi.