Golden Globes ilk rasmiy tadbirini Markaziy Osiyoda o‘tkazadi

Bu haqda Golden Globes ma'lum qilib, yangi tashabbus mintaqa iste'dodlarini qo‘llab-quvvatlash hamda kino sanoatida xalqaro hamkorlikni rivojlantirishga qaratilganini ta'kidladi.

Golden Globes prezidenti Helen Hoehne ta'kidlashicha, Markaziy Osiyo va Kavkaz boy madaniy meros hamda dunyo miqyosida kengroq e'tirof etilishiga munosib kuchli ijodiy salohiyatga ega.

Tashkilotchilar Silk Road Tribute Gala'ni rejissyorlar, aktyorlar, ssenariynavislar va prodyuserlar o‘z ishlarini xalqaro kino hamjamiyatiga namoyish etishi mumkin bo‘lgan yangi platforma sifatida ta'riflamoqda. Loyiha Vivid Strategies va Leto Productions hamkorligida amalga oshirilmoqda.

Markaziy Osiyo uchun ushbu tadbir mintaqaviy kino sanoati rivojida muhim qadam bo‘lishi mumkin.

So‘nggi yillarda Qozog‘iston, Qirg‘iziston, O‘zbekiston va mintaqaning boshqa davlatlarida suratga olingan filmlar nufuzli xalqaro kinofestivallarda tobora ko‘proq e'tirof etilmoqda.

Golden Globes'ning rasmiy tadbiri O‘zbekistonda o‘tkazilishi Markaziy Osiyoga bo‘lgan xalqaro qiziqish ortib borayotganining yana bir belgisi sifatida baholanishi mumkin. Bugungi kunda mintaqa tobora ko‘proq xalqaro forumlar, ko‘rgazmalar, sport musobaqalari va madaniy tadbirlarga mezbonlik qilmoqda. Endi bu ro‘yxatga kino olamining eng nufuzli brendlaridan biri ham qo‘shilmoqda.

Yosh rejissyorlar va prodyuserlar uchun esa bu o‘z iste'dodini xalqaro maydonda namoyish etish imkoniyatidir. Bunday platformalar yangi hamkorlar topish, investitsiyalarni jalb qilish va filmlarni xalqaro bozorga olib chiqishga xizmat qiladi.