Astana Games of the Future musobaqasiga tayyorgarlik ko‘rmoqda: 10 ming sayyoh va 800 nafardan ortiq ishtirokchi kutilmoqda

Tashkilotchilar maʼlumotiga koʻra, musobaqada 50 dan ortiq mamlakatdan 800 nafardan ortiq sportchi ishtirok etadi. Ular 4,75 million AQSH dollari miqdoridagi mukofot jamgʻarmasi uchun bahs olib boradi. Dastur anʼanaviy sport va raqamli texnologiyalarni uygʻunlashtirgan sakkizta yoʻnalishni oʻz ichiga oladi.

Qozogʻiston Turizm va sport vazirligi maʼlumotiga koʻra, Games of the Future musobaqasi mamlakatga 10 mingga yaqin xorijiy sayyohni jalb qilishi kutilmoqda. Rasmiylar bu mehmonxona biznesi, transport va xizmat koʻrsatish sohalarining rivojlanishiga ijobiy taʼsir koʻrsatishini kutmoqda.

Turnirning asosiy oʻziga xos jihati figital sport formati boʻlib, u jismoniy va raqamli musobaqalarni birlashtiradi. Dasturdan Phygital Football, Phygital Basketball, Phygital Fighting, shuningdek Counter-Strike 2, Dota 2, PUBG: Battlegrounds, Just Dance va FATAL FURY: City of the Wolves yoʻnalishlari oʻrin olgan.

World Phygital Community maʼlumotiga koʻra, xalqaro saralash bosqichlari yakunlangach, figital yoʻnalishlar boʻyicha ishtirokchilarning yakuniy tarkibi tasdiqlandi. Turnirga 17 ta milliy federatsiya vakili boʻlgan 40 ta klub yoʻllanma oldi.

Turnirga tayyorgarlikni Qozogʻiston hukumati ham koʻzdan kechirdi. Bosh vazir Oljas Bektenov maʼlumotiga koʻra, musobaqalar Astananing toʻrtta sport majmuasida – Barys Arena, Qazaqstan yengil atletika majmuasi, Jaqsylyq Ushkempirov nomidagi Yakkakurash saroyi hamda Milliy tennis markazi – Beeline Arenada oʻtkaziladi.

Turnirni oʻtkazish uchun 1 000 nafardan ortiq ko‘ngilli jalb etilgan. Shu bilan birga, xavfsizlik, raqamli infratuzilma va logistika masalalariga alohida eʼtibor qaratilmoqda. Qozogʻistonni musobaqada 11 ta jamoa namoyish etadi va ular barcha sakkiz yoʻnalishda ishtirok etadi.

Sport musobaqalaridan tashqari, tashkilotchilar Games of the Future City interaktiv maydonini ham tayyorlamoqda. Bu yerda zamonaviy texnologiyalar, kibersport va raqamli koʻngilochar loyihalar namoyish etiladi. Tashkilotchilar hisob-kitobiga koʻra, musobaqaga 100 mingdan ortiq tomoshabin tashrif buyuradi. Bu esa Games of the Futureni 2026-yilda Qozogʻistonda oʻtkaziladigan eng yirik xalqaro tadbirlardan biriga aylantirishi kutilmoqda.